علقت الإعلامية نجوى إبراهيم، على ردود الفعل التى صاحبت إعلانها إصابتها بالسرطان خلال حلقة برنامجها «بيت العز» على «نجوم إف.إم»، وقالت: «الأسبوع اللى فات حسيت إنى غلطت، أنا مش من النوع الشكّاي، اللى قلته مش شكوى لكن مشاركة معاكم».. تابعت: «لما روحت قعدت أبكي، لقيت ناس مليانة حب، من كتر الدعوات اللى جت لي، لكن كان عندى جلد للذات وقلت ليه أنكد عليكم، وكل واحد فيه اللى مكفيه وليه أقول كده والموضوع ده بقاله شهرين تلاتة، وبجرى فيه مع ولادى لكن ما يبانش».

وقالت «ماما نجوى»: «لكن زى ما زعلت، فرحت إنى فضفضت لأن أحلى حاجة الواحد يفضفض مع القريب منه واللى بيحبه، فممكن تسامحونى من غير ما يكون عندكم ذرة شك فى احترامى ليكم، وأنا مقدرة كل الحب اللى قلتوهولي، وربنا يسمع دعواتكم، لكن أول ما أنا أطمن هطمنكم، وما تشيلوش همى خالص، لكن ابعتولى همومكم وخلينى أنا الكبيرة اللى أستحمل».