السيسى :
نحتاج للإخلاص والعمل والدولة تعمل على تخفيف الأعباء
كان هناك محاولات في 2011 لإثارة العداء بين الحكومة و الشعب
مصر لن تنسى أبداً أهالى الصعيد والريف
جميع مشروعات التنمية هدفها المواطن المصرى


عبر الرئيس عبد الفتاح السيسى عن سعادته باستقبال أهالى قرية المعصرة في محافظة المنيا، قائلا: "شكرا على الاستقبال ده والكلام الحلو ده.. ده كلام حلو طالع من قلبكم.. حاجة تفرحنى وتشرفنى جدا.. قولت الكلام ده في سوهاج وفى المحافظات اللى بنزلها دلوقتي".

كما أكد الرئيس عبد الفتاح السيسى، أنه يرغب فى زيارة كل الأماكن فى مصر، متابعا: "أنا بتمنى أنزل وأشوف كل الناس.. صدقونى.. لأنى بحب الناس وزى الناس.. زيكم كده.. صحيح يعنى.. يعنى مش فى برج كبير ولا حاجة".

وأضاف الرئيس السيسى، خلال تناول الإفطار مع أهالى قرية المعصرة، حيث حرص الرئيس السيسى على التواجد مع أهل القرية: "أختى بتقول أنا والدة شهيد.. الاستقرار اللي حصل ده تمنه ولاد كتير من ولاد مصر.. وبنات من بنات مصر.. وشوفتوا هنا فى المنيا.. حاولوا يعملوا الفتنة علشان يخربوا بلدنا.. والبلد تسع لينا كلنا.. اللى منع ده كل أسرة مصرية زى أختى اللى قدمت ابنها ومحدش شافها.. ومحدش يعرفها.. وأنا أتشرف بيكى.. مهما كرمنا مش عملنا حاجة.. يديكى العافية والصحة ويصبرك ويراضيكى"

كما رحب عدد من أهالي قرية المعصرة بمركز ملوى، بالرئيس عبد الفتاح السيسى، خلال زيارته لمحافظة المنيا.
 
وقالت إحدى السيدات: "حضرتك أول مرة تنزل محافظة المنيا، وشريف لنا ولكل شمال الصعيد تواجد حضرتك معانا في القرية، وشكرًا على مشروع حياة كريمة الذي أضاف لنا مزيدًا من التطورات".
 
وقال أحد أهالى المنيا، موجها حديثه للرئيس السيسى: "أهلاً وسهلا بسيادة الرئيس المحترم.. رئيسى عبد الفتاح السيسى، أهلا وسهلا في مركز ملوى التابع لمحافظة المنيا، وربنا يحفظك" وتحدث الرئيس عبد الفتاح السيسي، مع سيدة من محافظة المنيا تطرقت في حديثها عن الرقابة على المشروعات الجديدة.
 
وقال الرئيس خلال الفعالية: "انتى بتتكلمى عن الرقابة.. الرقابة من مين وعلى مين؟.. اللى شغالين دول احنا، ومش معناه إنه مفيش رقابة.. انتبهوا.. اللى بيشتغلوا أهالينا وإن قصروا.. الحكومة مش الناحية التانية وده أمر خطير اتعمل خلال السنين فاتت.. وهو اللى أدى لمشكلة في 2011.. الحكومة في حتة وبقية الشعب في حتة، فبقت الحكومة عدو، والعدو نهده.. الحكاية اتعملت كده، لو ماخدناش بالنا". 
 
وأضاف الرئيس السيسى، خلال تناول الإفطار مع أهالى قرية المعصرة: "الجهاز الإدارى فيه 6 ملايين يعنى 6 ملايين أسرة يعنى 30 مليون مواطن.. لو الأسرة 5 أفراد أب وأم من 2 – 3 أطفال.. 30 مليون.. طب النهارده هنا فى موظفين قاعدين معانا طبعا.. فيه هنا مسئولين أكيد.. انتى تقولى بقي هننتهز الفرصة إنك موجود وأكد على كل مسئول معانا في المنيا يخلى باله من شغله.. يبقى احنا كده بنتكلم كلام مناسب للظروف الحياتية بتاعتنا.. ويارب أقدر وأسمع وأعمل". 
 
وتابع الرئيس السيسى: "كمان نقول لبعضنا هنا، إن أخويا وأبويا وابني اللى شغال في مكان ما، البلد محتاجة إخلاصك وأمانتك وعملك.. الإخلاص والأمانة والعمل.. وانتوا بتشوفوا دول أكبر مننا وأغنى مننا.. بتعاني من ده.. أتمنى من الله نفضل متماسكين شعب ودولة، واحنا من جانبها دولة تخفيف ما أمكن على الناس، احنا مع بعض بنعملها.. طول ما احنا بخير وسلام وأمان.. الحمد لله رب العالمين.. الحمد لله رب العالمين.. متشكرين وكل سنة وانتم طيبين".
 
وقال الرئيس السيسى، في نهاية كلمته: " أنا سعيد بيكم واتشرف بيكم.. اطمنوا  على مصر بيكم.. مصر قايمة بيكم.. وبتطلع بيكم.. وهتطلع لقدام بيكم انتم".