قررت المحكمة الاقتصادية بالمنصورة، تأجيل قضية طالب الطب الشرقاوي المتهم بالسب والتشهير والعنصرية ل "ماركوس راشفورد" لاعب نادي مانشستر يونايتد، عبر صفحته علي أحد مواقع التواصل الاجتماعي للحكم بجلسة 31 أغسطس المقبل.

كانت محكمة أبو حماد بمحافظة الشرقية، قررت إحالة قضية طالب الطب التي أثارت جدلا واسعا  والمتهم فيها بالسب والتشهير ب"ماركوس راشفورد" لاعب نادي مانشيستر يونايتد الانجليزي إلي المحكمة الاقتصادية بالمنصورة.

وقال سيد سلامة محامي طالب الطب، تعود أحداث الواقعة لشهر إبريل عام 2021، عندما تقدم وكيل ماركوس راشفورد، لاعب مانشيستر يونايتد الانجليزي، بشكوي للنيابة العامة بأبو حماد والتي حققت فيها تحقيقًا قضائيًا، ضد "محمد عصام" ، طالب بالفرقة الخامسة بكلية الطب الطبيعي، وإدعي أن الأخير قام بنشر عبارات تتضمن اساءه وتشهير بموكله، وانتهي الأمر إلي حفظ القضية في يناير 2022، بناءًا علي أن الأدلة غير كافية للدعوي، لافتًا أن الأول استعان ب 10 محامين للدفاع عنه.

وتابع محامي الطالب" محمد عصام"، أنه تفاجأ بجنحه مباشرة مقامه من قبل راشفورد أمام محكمة أبو حماد، ثم قضت بعدم الاختصاص وتم احالتها للمحكمة الاقتصادية بالمنصورة، وحددت نظر الاتهام لجلسة 16/ 2022، ثم تم تأجيلها إلي جلسة 7/7/2022 لاستكمال الدفاع والمرافعة والمستندات والمذكرات الختامية.

وأشار  سيد سلامة المحامي، إلي أن دفاع "ماركوس راشفورد" طالبوا بحبس الطالب، ودفع تعويض مالي قيمته 15 ألف جنيه مؤقتًا، لافتًا أن مباحث الانترنت قامت بفحص حساب الطالب وتبين أنه لا توجد سمة رسائل موجودة علي الهاتف الخاص بالطالب، موضحًا أنه سيقوم بطلب تعويض أمام المحكمة بنفس المبلغ لحين صدور الحكم النهائي ومن ثم المطالبة بتعويض آخر.

وكان الطالب علق عبر صفحته الشخصية علي موقع التواصل الاجتماعي "فيس بوك قائلاً: " أنا متكلمتش في موضوع اللاعب ماركوس راشفورد ده نهائي لسبب واحد و أنا المتهم في القضية طبعا بس خلونا نتكلم بقي.. أولا كده الناس بتتعامل مع الموضوع علي أنه أنت فين و ماركوس راشفورد فين !! ك بُعد مسافات و ك بُعد مكانة بينك و بينه.. لكن أحب أقولكم و بكل أمانة و صدق من خالص قلبي أنا و ماركوس راشفورد اودام طاولة القانون سواء و دي حاجة بجد انا اتشرفت بيها من كل قلبي".  

"اللي حصل جتلي دعوة سب و قذف علي ماركوس راشفورد و روحت النيابة و النيابة قالت ايه بقي ؟ .. قالت بعد عمل فحص فني للأكونت علي يد المقدم المهندس أحمد عادل اتضح إن الاكونت ده اكونت محمد عصام .. طيب تمام .. فين العبارات اللي شتمك بيها ؟ مش موجودة  نصا و الورق تحت ! إنه بعد إجراء الفحص الفني ثبت ملكية الحسابات لمحمد عصام لكن تم حذف العبارات و الصور الضوئية " اللي هي الاسكرينات يعني اللي جابها المحامين ".

"العبارات اللي مش موجودة اصلا جاءت علي مسؤوليتهم الشخصية .. يعني في حالة البراءة ان شاء الله.. صدقني بجد مش هسيب حد في حاله ولا هسيب حقي لأني بمتحن و زمايلي عارفين و الحوار بقاله سنتين اهو و طبعا عارفين كم الضغط النفسي من حاجة زي دي". 

"النيابة العامة قررت حفظ المحضر وإلغاء الشبهة لسبب وهو إن العبارات دي مش موجودة و ملكيتي للاكونت لا تجزم إني مرتكب الجريمة.. انت ممكن مفبرك اسكرينات لاكونت بنفس شكل اكونتي، ثالثا البحث الجنائي لم يتوصل لحقيقة الواقعة ، رابعا لم يُذكر اسم المجني عليه اصلا في العبارات ".

"خامسا و دي الاهم اني تواصلت مع ماركوس راشفورد عن طريق ناس في بريطانيا و قالوا إنه ميعرفش حاجة عن القضية و لا يُدير حسابه الشخصي لكن في شركة راعية ماسكة الاكونتات بتاعته و طبعا كله عايز تعويض من طالب دكتور بقي و أهله هيدفعوا و هيخافوا علي مستقبله".

"سادسا و أخيرا.. إن النيابة العامة رفضت القضية لأن المحاميين بتوع ماركوس معاهم توكيل رسمي عام بالقضايا و المفروض قضايا السب والشتم دي بيبقي يها توكيل خاص اللي هو ممعهمش اصلا فحفظ المحضر ".

" و راحوا رافعين جنحة مباشرة و دي جلسة اودام محكمة علطول لازم امضي عليها علشان تنعقد  اصلا لو ممضتش مش هتتعمل و اي محامي فاهم كده روحت ماضي علي الجلسة و قولت هحضر و هقوم محامي  و هتنعقد علشان أنا علي ثقة تامة إن الكلام ده النيابة اصلا نفت صحته فسيبك من رأيي انا وكلت المستشار السيد سلامة واحد من اكبر المحامين و غني عن التعريف".

" فخدت تأجيل لجلسة 7 / 7 و ان شاء الله ثقة في الله و في القضاء المصري اللي مبيفرقش ما بين ماركوس راشفورد " اللي هو ميعرفش القضية اصلا " و محمد عصام الجنحة المباشرة دي امام القانون هي حاجة بسيطة لأن اللي عملها المجني عليه مش النيابة العامة .. و مع العلم لما جتلي الدعوة الاولي بتاعت النيابة مقومتش محامي بل اتحفظت لوحدها لأن كل كلامهم ده محصلش و فعلا اتحفظت.. لكن صدقوني لا يحيق المكر السئ إلا بأهله .. و آخر حاجة انا واحد من كبار عشاق مانشستر يونايتد في مصر و كل الناس عارفه كده .. حتي اختصاصي في مجال الطب الرياضي و الرياضيين هدفي اصلا ابقي دكتور لنادي مانشستر يونايتد".

"ماركوس راشفورد اتعمل عليه حملة عنصرية من اهل بلده لما خسر نهائي امم اوروبا و ضيع اخر ركلة جزاء لأنه ده منتخب بلدهم و يهمهم .. لكن مع مانشستر يونايتد  أنا طول عمري بدعم مانشستر و طول عمري بحب مانشستر و مش زعلان حتي من اللي بيحصل لأن مانشستر دي حب حياتي من 13 سنة لحد انهارده و ان شاء الله البراءة جاية و مش هسيب كل من تسبب في أذي نفسي ليا بعدها و هحطهم تحت طاولة القانون اللي عندي كامل الثقة فيه" .