في صباح شم النسيم، قبل الفسيخ والبصل وقبل حتى خروجة الحديقة، بتبدأ طقوس البهجة عند كل بيت مصري بـ"تلوين البيض"، لحظة منتظرة من الأطفال،ومهمة دقيقة للأمهات،لكن مع القلق من المواد الكيميائية، بقى الاتجاه للألوان الطبيعية هو الأأمن والأجمل في نفس الوقت،والسنة دي، شم النسيم 2025، نرجع للطرق البسيطة اللي فيها أمان وصحة،ولون يفرح العين.

6 خطوات لتلوين البيض بمواد طبيعية:

1. استبدلي الصناعي بالطبيعي

نسيب ورانا الملونات الصناعية ونلجأ لألوان من الطبيعة زي الكركديه، الكركم، البنجر، وقشر البرتقال، متوفرة عند العطار وسهلة الاستخدام، وبتدي لمعة هادية من غير ما تبهت أو تلوّث.

2. ضيفي خل أو ليمون لمياه السلق

قطرات بسيطة من الخل أو عصير الليمون في مياه السلق بتساعد على تثبيت اللون، وتقوي قشرة البيضة علشان تستحمل التلوين من غير ما تتشقق.

3. سلق البيض بعناية

اسلقي البيض لمدة 12 دقيقة، لكن خدي بالك إنه يكون بدرجة حرارة الغرفة قبل السلق، علشان القشرة ما تتكسرش.

4. ما تحطيش البيض في مياه باردة

بعد السلق، سيبي البيض يبرد لوحده في الهواء، غمره في مياه باردة ممكن يبوظ القشرة ويأثر على امتصاص اللون.

5. جهزي ألوانك من قبلها بيوم

لو عاوزة لون أحمر، انقعي أوراق الكركديه في مياه من الليل، لون أصفر؟ استخدمي قشر البرتقال أو الكركم، وكل لون محتاج البيض يتنقع فيه بعد السلق لمدة 3 ساعات على الأقل.

6. خلى البهجة صحية ونظيفة

ميزة الألوان الطبيعية إنها مش بس صحية، لكنها كمان سهلة التنظيف، وبتوفر عليكِ غسيل طويل بعد الاحتفال.

تلوين البيض مش بس تقليد شعبي، ده كمان لحظة دافية بتجمع العيلة على الفرح، ومع شوية وعي واستخدام طبيعي، نقدر نحافظ على صحة أولادنا من غير ما نبوّظ طقوسنا، ودايمًا، الطبيعة فيها الحل الأبسط والأجمل.