أعجبتنى رسالة الزميلة الكاتبة منى أحمد عن كهف الجارة، كنز أثرى لم يأخذ منا الاهتمام . ويحتاج إلى إعلام الناس به، وتوعيتهم بالآثار التى تضمها . تقول : تخيل تبقى ماشى فى وسط الصحراء فتلاقى قدامك حفرة فى الأرض فتدخل فيها فتلاقى نفسك فجأة اتنقلت لمكان تانى أشبه بالأماكن الخيالية اللى فى أفلام الأساطير، وكأنك دخلت لفجوة زمنية نقلتك لمكان وزمان تاني.. ده اللى هيحصلك لو دخلت كهف الجارة فى الصحراء الغربية.

كهف الجارة واحد من عجائب مصر اللى كتير ما يعرفوش عنها حاجة، مكان أسطورى بمعنى الكلمة، من أغرب الأماكن اللى ممكن تشوفها فى حياتك بسبب تكوين الكهف العجيب وشكله الغريب من جوه. عندما تدخل الكهف ده حتلاقى تكوينات جيولوجية حتبهرك أشبه بشلالات مياه متحجرة نازلة من أعلى الكهف فى إبداع ربانى مش حتتخيل إنه موجود إلا فى قصص الأساطير. العجيب بقى إن الرواسب اللى نازلة من فوق دى أصلًا حصلت بسبب تسريب المياه من خلال رمال الصحراء على مدار ملايين السنين وبسبب الحرارة الشديدة اتجمدت بالشكل ده عشان تعمل المكان الخيالى ده.
 

الكهف، اكتشفه رحالة ألمانى وكان معاه الدليل بتاعه وبعد عاصفة شديدة لقوا المكان ده قدامهم فدخلوه يحتموا فيه. فلقوا واحد من أندر كهوف العالم حتى الألمان قالو عليه إنه أجمل مكان عينك ممكن تقع عليه فى قارة أفريقيا. الكهف مكون من عدة مغارات وموجود على بعد ٥٠ مترا تحت باطن الأرض وهو بين الواحات البحرية ومدينة أسيوط اللى بيبعد عنها حوالى ١٤٠ كيلو.

من الحاجات اللى اكتشفوها جوه الكهف هى بعض المنحوتات البدائية اللى بيرجع تاريخها لعصر الإنسان البدائى وده بيوحى إن الكهف ده كان ملجأ للإنسان من آلاف السنين، كفاية بس إنك تعرف إن عمر الكهف ده يعدى آلاف السنين .

فعلا مصر أم الدنيا، وبها ثلث آثار العالم، وإن شئت القول مصر بها أعظم آثار العالم .
دعاء : اللهم احفظ مصر .