والله ما عارف أكتب إيه..؟!

فالدنيا كلها ملخبطة علي بعضها.. وخريطة العالم كلها بتتغير.. هل أكتب عن التحالفات القديمة التي تحولت لعداوات جديدة؛.. وللّا عن الدول التي تنادي بالحرية والديموقراطية.. فأصبحت فاشية استعمارية؟!

أكتب عن أمريكا اللي عايزة تلتهم جرينلاند؛ وللّا عن روسيا اللي عايزة في المقابل أوكرانيا كلها بأراضيها وشعبها وسلطاتها وبابا غنوجها..؟!

أكتب عن أوروبا و أمريكا اللي وقعوا في بعض؛ وللّا عن الحروب اللي شغالة بالوكالة في منطقتنا العربية في السودان وليبيا واليمن و الصومال وسوريا.. ومؤامرات الأشقاء اللي أصبحوا ألعن من الأعداء؟!

وللا أكتب عن البلاوي اللي حصلت في كأس الأمم بالمغرب.. التي حولت لعبة كرة القدم الجميلة من الساحرة المستديرة إلي "الساحرة الشريرة"؟

بصراحة نفسي أكتب عن كل هذه البلاوي؛ لكن ما منعني هو أن ما يحدث في منطقتنا وفي العالم كله الآن لايحتاج لتحليل سياسي..دا محتاج لتحليل سكر وضغط.. وأنا مش ناقص .. لامؤاخذة..!

 بالمناسبة.. أنجبت منذ أيام عجوز إثيوبية ولدًا وهي في السادسة والسبعين من عمرها..!

يعني كل اللي بيحصل في العالم الآن من بلاوي جايز.. بدليل خلف العجايز..!

 الكلام دا كتبته من واحد وتلاتين سنة.. بالتحديد في مارس عام 1995: بعض الدول العربية تستحق عن جدارة الجايزة الأولي في بطولة العالم للجري.. نحو إسرائيل ..!

 شيلني وأشيلك..!

الداهية السياسي سيرجي لافروف وزير خارجية روسيا قالها بصريح العبارة: لا إحنا ولا الصين عايزين جرينلاند.. وواشنطن عارفة كدا.. يعني بالمختصر المفيد روسيا بتقول ل ترامب سكّتك خضرا يا هندزة.. ادخل برجلك اليمين وبرطع في جرينلاند؛ فالطريق مفروش لك بقدونس وكزبرة..!

واضح إن روسيا بتلعب علي كبير قوي علي طريقة "شيلني وأشيلك"..!
هاتوحشنا يا أخ زيلينسكي.. فأوكرانيا هاتروح في الوبا زي ماراحت هنادي ياأماااااي..!

 يبدو إن الكابتن "رضا" ليس له من اسمه نصيب..!!

فبسلامته مش راضي عن أي حاجة وكل حاجة.. واليومين دول شغال هجوم علي منتخبنا الوطني لكرة القدم ومديره الفني بعد نكسة كأس الأمم.. وعنده حق طبعا..

لكن السؤال هو: طيب وبسلامتك إنت قدمت إيه للكورة..؟!

دا أنت لما كنت مديرا فنيا لفريق طنطا كان الفريق أول الهابطين من الدوري..!
وأنا بعيني اللي هايأكلهم الدود شفتك وسمعتك صوت وصورة وإنت بتلطم وتولول، وبتصرخ علي فريقك: "يا لهوي.. يا لهوي.. دول حتي مش عارفين يباصوا الكورة"..!!

يا عم رضا والنبي لايمها شوية مش ناقصة حضرتك.. إحنا فينا اللي مكفينا..!
يعني لا تعايره ولا يعايرك.. فالهم طايلك وطايله..!